AQSh xitoylik talabalar vizalarini bekor qilmoqda
AQSh xitoylik talabalar va dasturiy ta’minotga qarshi choralar ko‘rmoqda.
AQSh hukumati Xitoy fuqarosi bo‘lgan ba’zi talabalar uchun vizani berish tartibini qat’iylashtirmoqda va ayrim hollarda vizani butunlay bekor qilishi mumkin. Bu haqda AQSh Davlat kotibi Marko Rubio ijtimoiy tarmoqdagi sahifasida ma’lum qildi.
Rubioning so‘zlariga ko‘ra, yangi cheklovlar asosan Xitoy Kommunistik partiyasi bilan aloqador yoki strategik sohalarda tahsil olayotgan talabalarni qamrab oladi.
Shuningdek, u AQSh Gonkongdan kelayotgan arizachilar uchun ham viza siyosatini qayta ko‘rib chiqayotganini ta’kidladi. Yangi qoidalar asosida viza rasmiylashtirish jarayonida yanada chuqurroq xavfsizlik tekshiruvlari o‘tkaziladi.
Bundan tashqari, AQSh ma’muriyati Xitoyning yarimo‘tkazgichlar ishlab chiqarishida foydalaniladigan dasturiy ta’minotga kirishini cheklash bo‘yicha ham choralar ko‘rishni rejalashtirmoqda.
Mutaxassislarning fikricha, bu qaror AQSh va Xitoy o‘rtasidagi texnologik va ta’lim sohalaridagi keskin raqobatning yana bir ko‘rinishi sifatida baholanishi mumkin.
