Endi Nyu-York–Parij parvozi 1 soatga ham bormaydi
Stargazer samolyoti aviatsiyaga yangi davr olib keladi.
Texas shtatida joylashgan Venus Aerospace kompaniyasi jahon aviatsiyasida tub burilish yasashi mumkin bo‘lgan loyiha ustida ish olib bormoqda. Kompaniya taqdim etgan ma’lumotlarga ko‘ra, ular Stargazer nomli gipertovushli samolyotni ishlab chiqishni rejalashtirmoqda. Bu samolyot Nyu-Yorkdan Parijga yoki Londonga bor-yo‘g‘i 55 daqiqada yetib boradi.
E’tiborga molik jihat shundaki, Nyu-York va Parij orasidagi masofa 5833 km, Nyu-York va London orasidagi masofa esa 5567 km ni tashkil etadi. Mazkur masofani bir soatdan kamroq vaqt ichida bosib o‘tish — aviatsiya sohasida inqilobiy yondashuvdir.
Venus Aerospace avvalroq aylanuvchi portlovchi raketa dvigateli bo‘yicha atmosfera sinovlarini muvaffaqiyatli o‘tkazgan edi. Ushbu dvigatel an’anaviy yonishdan farqli ravishda, ketma-ket portlashlar orqali zarba kuchi hosil qiladi. Sinovlar Nyu-Meksikodagi kosmodromda amalga oshirilgan.
Kompaniyaning rejasiga ko‘ra, aynan shu innovatsion dvigatel Stargazer samolyotiga o‘rnatiladi. Muhandislar hisob-kitobiga ko‘ra, u Mach 4 gacha — ya’ni soatiga 4,939 km tezlikka erisha oladi. Bu tovush tezligidan to‘rt baravar yuqori ko‘rsatkichdir.
Agar loyiha muvaffaqiyatli amalga oshsa, xalqaro aviaqatnovlar sohasi tubdan o‘zgarishi, uzoq masofalar endilikda qisqa vaqt ichida bosib o‘tilishi mumkin.
