Bolgariyada yevroga qarshi norozilik namoyishlari bo‘lib o‘tmoqda
Aholi Bolgariya levasini saqlab qolishni talab qilmoqda.
Bolgariyada yevro valyutasining joriy etilishiga qarshi norozilik namoyishlari avj olmoqda. Aksiya va mitinglar millatchi hamda rossiyaparast partiyalar, jumladan “Vazrajdane” partiyasi tomonidan tashkil etilgan. Namoyishchilar milliy valyuta — Bolgariya levasini saqlab qolishni talab qilmoqda.
Sofiyada o‘tkazilgan namoyishlarda ishtirokchilar “Bolgariya levasini saqlab qolish uchun jang – Bolgariyaning so‘nggi jangidir” degan shiorlar ostida chiqish qilishdi. Ular inflyatsiya xavfi, xarid quvvatining pasayishi haqida ogohlantirib, hukumatdan bu borada referendum o‘tkazishni talab qilmoqda.
Yevroga qarshi chiqayotganlar safida Bolgariya prezidenti Rumen Radev ham bor. U referendum o‘tkazish g‘oyasini qo‘llab-quvvatlagan. Biroq parlamentdagi Yevropa Ittifoqi tarafdorlari bu tashabbusni rad etib, Radevni rossiyaparast siyosatda aybladi. Shu bilan birga, 4 iyun kuni Yevrokomissiya Bolgariyaning 2026-yil 1-yanvardan evroga o‘tishini tasdiqlashi kutilmoqda. Iyul oyida esa levaning yevroga rasmiy almashuv kursi e’lon qilinadi.
