Hindistonda koronavirus bilan kasallanish keskin oshdi
So‘nggi bir sutka davomida 360 dan ortiq yangi holat qayd etilgan.
Hindistonda koronavirus infeksiyasi bilan kasallanish holatlari keskin ko‘paydi. Mamlakat Sog‘liqni saqlash va oilaviy farovonlik vazirligining ma’lumotiga ko‘ra, COVID-19 bilan kasallanganlar soni 3700 nafardan oshgan. Bu oxirgi bir necha oy ichidagi eng yuqori ko‘rsatkichdir.
So‘nggi bir sutka davomida 360 dan ortiq yangi holat qayd etilgan. Kasallik oqibatida ikki bemor – 63 yoshli erkak va 24 yoshli ayol vafot etgan. Har ikki holatda ham bemorlar yondosh kasalliklarga ega bo‘lgan.
Yangi holatlarning eng ko‘p qismi Kerala (1336 holat), Maxarashtra (467) va Dehli (375) shtatlarida aniqlangan.
O‘tgan haftada butun mamlakat bo‘yicha atigi 257 ta holat aniqlangan edi. Bu ko‘rsatkich 10 kun ichida qariyb 15 barobar oshgan.
Sog‘liqni saqlash mutasaddilari aholiga hushyorlikni saqlash, jamoat joylarida niqob taqish, ijtimoiy masofani saqlash va shaxsiy gigiyena qoidalariga amal qilishni tavsiya qilmoqda.
Kasallanish holatlarining ko‘payishi ikki yangi virus subvariantlari — NB.1.8.1 va LF.7 bilan bog‘liq ekani qayd etilmoqda. Ular Xitoy, Tayvan, Gonkong va Avstraliyada ham tarqalgan. JSST ularni hozircha “nazorat ostidagi variantlar” ro‘yxatiga kiritgan.
O‘zbekistonda esa epidemiologik vaziyat barqaror. Sanitariya-epidemiologik osoyishtalik qo‘mitasi raisi birinchi o‘rinbosari Nurmat Otabekovga ko‘ra, yangi shtammlarning tarqalishi kuzatilmayapti va aholi orasida xavotirga asos yo‘q.
