Xitoy xalqaro sahnada AQShni ortda qoldirmoqda

 

AQSh prezidenti Donald Trampning siyosiy qaytishi va import bojlarini joriy qilishi oqibatida dunyo yetakchi davlatlarida Qo‘shma Shtatlarga nisbatan munosabat salbiy tus oldi. Ayniqsa, Xitoyga bo‘lgan ijobiy qarashlar soni so‘nggi besh yillikda eng yuqori darajaga ko‘tarilgan. Bu haqda Axios portali xabar berdi.

 

So‘nggi bir yarim yillik kuzatuvlarga ko‘ra, Tramp saylovda g‘alaba qozonganidan so‘ng Qo‘shma Shtatlarga bo‘lgan ishonch bir muddat ortgan bo‘lsa-da, uning rasmiy inauguratsiyasidan keyin bu reyting tez sur’atda pasayishni boshlagan.

 

May oyiga kelib AQSh reytingi salbiy darajaga yetdi. Bu holat Vashington va Pekin o‘rtasida bojxona tariflarini vaqtincha bekor qilish hamda muzokaralar o‘tkazish bo‘yicha erishilgan kelishuv tufayli bir muddat barqarorlashdi. Biroq Trampning Xitoyni kelishuv shartlarini buzganlikda ayblashi yana obro‘ga salbiy ta’sir ko‘rsatdi.

 

Ayni vaqtda Xitoyga nisbatan xalqaro munosabat izchil yaxshilanmoqda. 2024-yil iyul oyidan beri bu tendensiya davom etmoqda: 30-may holatiga ko‘ra, Xitoy reytingi 8,8 ballga yetgan bo‘lsa, AQSh reytingi 1,5 ball bilan ancha orqada qolmoqda.