Buyuk Britaniyada mahalliy aholi soni keskin kamaymoqda

 

Buyuk Britaniyada oq tanli britaniyaliklarning (ota-onasi ham ushbu mamlakatda tug‘ilgan mahalliy aholi) ulushi tarixda ilk bor ozchilikka aylanishi mumkin. Bu haqda The Daily Telegraph nashri xabar bermoqda.

 

Bukingem universiteti olimlari, siyosatshunos va immigratsiya bo‘yicha mutaxassis professor Mett Gudvin boshchiligidagi tadqiqot guruhi, Britaniya aholisining demografik tarkibi yuzasidan Milliy statistika xizmati (ONS) rasmiy ma’lumotlariga asoslangan keng ko‘lamli tahlil o‘tkazdi. Unda tug‘ilish, o‘lim va migratsiya ko‘rsatkichlari asosida 21-asr oxirigacha demografik o‘zgarishlar prognoz qilingan.

 

Tadqiqot natijalariga ko‘ra, 2050-yilga borib oq britaniyaliklarning ulushi 73 foizdan 57 foizgacha kamayadi. 2063-yilga kelib esa ushbu ko‘rsatkich 50 foizdan pastga tushadi, bu esa ularni mamlakatdagi ozchilik guruhiga aylantiradi. Asr oxiriga borib, oq britaniyaliklar ulushi 33.7 foizgacha tushishi mumkin.

 

Tadqiqot shuningdek, immigratsiya va muhojirlar avlodlari sonining jadal o‘sishini ham qayd etmoqda. 2049-yilga borib Buyuk Britaniyada chet elda tug‘ilgan yoki kamida bitta ota-onasi muhojir bo‘lgan aholi ulushi 33.5 foizga yetishi, 2100-yilga kelib esa bu ko‘rsatkich 60 foizni tashkil etishi kutilmoqda.

 

Shuningdek, musulmon aholining o‘sish tendensiyasi ham ajratib ko‘rsatilgan. 2024-yildagi 7 foizlik ko‘rsatkich 2049-yilga kelib 11.2 foizga, asr oxiriga borib esa 19.2 foizgacha ko‘tarilishi mumkin.

 

Professor Gudvin bunday demografik o‘zgarishlar Buyuk Britaniya uchun muhim sinov bo‘lishini ta’kidladi: “Tadqiqotimiz mamlakatimizning bu miqyosdagi o‘zgarishlarga moslasha olishi va ularni samarali boshqarish salohiyati borasida jiddiy savollarni yuzaga chiqaradi”.

 

2023-yilda Buyuk Britaniyaga sof migratsiya oqimi 860 ming kishiga yetgan, 2024-yilda bu ko‘rsatkich 431 mingtaga tushgan bo‘lsa-da, hali ham 2010-yillar o‘rtasidagi yillik o‘rtacha ko‘rsatkich (244 ming) dan ancha yuqoriligicha qolmoqda.