Germaniyada ikkinchi jahon urushiga oid bombalar topildi
Ko‘ln shahrida portlamagan bombalar sababli yirik evakuatsiya ishlari boshlandi.
Ko‘ln shahrida Ikkinchi jahon urushidan qolgan uchta portlamagan havo bombasining topilishi ortidan urushdan keyingi davrdagi eng yirik evakuatsiya tadbiri boshlandi. Xabarlarga ko‘ra, evakuatsiya choralari 20,500 ga yaqin fuqaroga ta’sir ko‘rsatmoqda.
Ushbu bombalar shahar markazidagi Deutz tumanida, dushanba kuni aniqlangan. AQShda ishlab chiqarilgan bombalarning og‘irligi 2 tonnagacha bo‘lib, ular topilgan hududdan 1 kilometr radiusda evakuatsiya amalga oshirilmoqda.
Mazkur zona ichida RTL teleradiokompaniyasi, kasalxona, ikkita qariyalar uyi, temiryo‘l vokzali, ko‘rgazma markazi, Lanxess Arena, musiqa markazi, filarmoniya, bir nechta muzeylar, 58 ta mehmonxona, 9 ta maktab, bolalar bog‘chalari va bir nechta muhim ma’muriy binolar joylashgan.
Rasmiylar bu holatni “Ikkinchi jahon urushidan beri eng katta evakuatsiya harakati” deb atamoqda.
Ma’lumotlarga ko‘ra, urush yillari Germaniya hududiga 2 milliondan ortiq bomba tashlangan bo‘lib, ularning 10–20 foizi portlamay qolgan. Bu kabi snaryadlar hozirgacha har bir necha oyda qurilish ishlari yoki yo‘l yotqizish vaqtida topiladi. Odatda ular tez va xavfsiz tarzda sapyorlar tomonidan zararsizlantiriladi.
