Meksikada avtobus halokati 11 kishining hayotiga zomin bo‘ldi
Hodisa joyida tergov ishlari boshlangan.
Meksikaning shimoli-sharqida joylashgan Nuevo-Leon shtatidagi Hualaxuises shaharchasida avtobusning ag‘darilib ketishi oqibatida 11 kishi halok bo‘ldi, 20 dan ortiq yo‘lovchi turli darajadagi tan jarohatlarini oldi. Bu haqda mahalliy huquq-tartibot idoralari xabar berdi.
Rasmiy ma’lumotlarga ko‘ra, fojea avtobus haydovchisining boshqaruvni yo‘qotishi natijasida sodir bo‘lgan. Transport vositasi yuqori tezlikda harakatlanayotgan bo‘lgan va yo‘l chetidagi chuqurlikka qulab tushgan. Hodisa joyiga bir necha daqiqalar ichida tez yordam mashinalari, o‘t o‘chiruvchilar va politsiya yetib kelgan.
Jarohatlanganlar yaqin atrofdagi kasalxonalarga yetkazilgan. Ulardan ba'zilari og‘ir ahvolda bo‘lib, shifokorlar ularning hayotini saqlab qolish uchun kurashmoqda.
YTH yuzasidan rasmiy tergov ishlari boshlangan. Dastlabki taxminlarga ko‘ra, yo‘lning namligi yoki transport vositasining texnik nosozligi halokatga sabab bo‘lgan bo‘lishi mumkin.
Mahalliy hokimiyat fojia yuzasidan chuqur hamdardlik bildirib, qurbonlarning oila a'zolariga zarur yordam ko‘rsatilishini ma’lum qildi.
