Vetnamda “ikki bola” siyosati bekor qilindi
Vetnam er-xotinlarga farzandlar sonini o‘zi belgilashga ruxsat berdi.
Vetnam hukumati mamlakatda tug‘ilish darajasi pasayib borayotgani sababli oilalarga nisbatan qo‘llanilgan “ikki bola” siyosatini rasman bekor qildi.
Yangi siyosatga ko‘ra, endilikda Vetnamlik er-xotinlar nechta farzand ko‘rishni o‘zlari mustaqil hal qilish huquqiga ega bo‘ldi. Ilgari esa hukumat oilalarni maksimal ikki bola bilan cheklab, bu tartibga amal qilmaganlarga, ayniqsa kommunistik partiya a’zolariga nisbatan intizomiy choralar qo‘llagan.
Cheklov dastlab 1988-yilda joriy qilingan edi. O‘sha paytda tug‘ilish darajasi har bir ayolga to‘rtdan ortiq bolani tashkil etgan. Bugunga kelib bu ko‘rsatkich 1,91 gacha tushib ketdi — bu esa mamlakatning iqtisodiy o‘sish istiqbollari va ishchi kuchi zaxirasiga tahdid solmoqda.
Mutaxassislar Vetnamni qarib borayotgan aholi va past tug‘ilish ko‘rsatkichi fonida demografik inqiroz kutayotganini ta’kidlashmoqda. Hukumatning bu qarori aholi sonini barqarorlashtirish va iqtisodiy faollikni saqlab qolishga qaratilgan muhim qadam sifatida baholanmoqda.
