Nemis avtomobilsozligi Osiyolik raqobatchilardan ortda qolmoqda
Avtomobilsozlikdagi raqobat keskinlashib bormoqda.
2025-yilning birinchi choragida dunyo avtomobil bozorida sodir bo‘lgan o‘zgarishlar nemis avtomobilsozligini og‘ir vaziyatga qo‘ydi. Konsalting kompaniyasi EY (Ernst & Young) tomonidan olib borilgan tadqiqotga ko‘ra, dunyoning eng daromadli olti avtomobil ishlab chiqaruvchisidan beshtasi Osiyoga tegishli, nemis brendi BMW esa uchinchi o‘rinni saqlab qolgan yagona Yevropa vakili bo‘lib qoldi.
Tadqiqotda dunyoning yetakchi 20 avtomobil konserni moliyaviy ko‘rsatkichlari tahlil qilingan. Unga ko‘ra, Germaniyaning uch yirik kompaniyasi — Volkswagen, BMW va Mercedes-Benz — umumiy savdo hajmini 2,3 foizga yo‘qotgan. Shulardan faqat Volkswagen biroz o‘sishga erishgan bo‘lsa, BMW va Mercedes’da sezilarli darajadagi pasayish kuzatilgan. Umumiy foyda esa har uchala kompaniya uchun o‘rtacha uchdan birga qisqargan.
Xuddi shunday salbiy tendensiyalar AQSh avtomobilsozligida ham kuzatilgan: savdo 2,9 foizga pasaygan, foyda esa deyarli uchdan birga kamaygan.
Ammo Osiyo bozori butunlay boshqacha manzara namoyish qilmoqda. Xitoy avtomobilsozligi 2025-yilning birinchi choragida savdolarni qariyb 15 foizga, foydani esa 66 foizga oshirishga muvaffaq bo‘lgan. Bu borada eng yaxshi natijalarni BYD va Geely kompaniyalari ko‘rsatgan. Eslatib o‘tamiz, Geely hozirda shved brendi Volvo hamda mashhur London taksilari ishlab chiqaruvchisi The London Taxi kompaniyasiga egalik qiladi.
Yaponiya va Janubiy Koreya ishlab chiqaruvchilari ham musbat natijalar qayd etgan — bu esa Osiyo avtomobilsozligining global bozorda tobora kuchayib borayotganini tasdiqlaydi.
Tadqiqot mualliflari ogohlantiradi: “Agar foyda darajasi yana pasayishda davom etsa, ayrim yirik ishlab chiqaruvchilar hayot-mamot masalasiga duch kelishi mumkin, chunki avtomobilsozlikdagi raqobat nihoyatda keskin.”
Bu holat Germaniya avtomobil sanoatini tubdan o‘zgarishlar qilishga undashi mumkin. Bozorda omon qolish uchun nemis konsernlari innovatsiyalar, elektromobillar va Osiyodagi raqobatchilarga qarshi raqobatbardosh strategiyalar ishlab chiqishi zarur bo‘ladi.
