Tramp va Ilon Mask o’rtasiga sovuqchilik tushdi
Ular o’rtasidagi ziddiyat keskinlashmoqda.
AQSH Prezidenti Donald Tramp va milliarder Ilon Mask o‘rtasidagi kelishmovchilik nihoyat ochiqchasiga portladi. Ularning bir vaqtlar manfaat asosida qurilgan ittifoqi endi shaxsiy hujumlar va og‘ir ayblovlar bilan almashtirildi. Bu mojaro Tramp Germaniya kansleri bilan uchrashuvi chog‘ida Maskning Tramp taklif qilgan qonun loyihasini tanqid qilgani ortidan boshlangan.
Boshlanishida Tramp yumshoqroq munosabat bildirgan: “U meni emas, qonunni tanqid qilgan. Bu menga yoqdi”, degan edi. Ammo uchrashuv oxiriga kelib, Tramp va Mask o‘zaro so‘z jangiga kirishib ketgan. Mask “X” platformasida tez-tez yozib, Trampga bevosita va shaxsiy hujumlar qila boshlagan. Tramp esa bunga “Truth Social” orqali javob bergan.
Mask mojaro chog‘ida juda og‘ir ayblov bilan chiqdi – u Trampni mashhur moliyachi va jinsiy jinoyatlar uchun hibsga olingan Jeffrey Epstein bilan bog‘ladi. “@realDonaldTrump Epstein hujjatlarida bor. Shu sababli ular e’lon qilinmayapti,” deb yozdi Mask. U postini: “Kelajak uchun belgilab qo‘ying. Haqiqat ochiladi”, degan so‘zlar bilan yakunladi.
Mask qanday qilib ushbu ma’lumotlarga ega bo‘lganini tushuntirmagan. Shuningdek, biror ismning Epstein hujjatlarida borligi, u odam jinoyatda ayblanayotganini anglatmaydi. Oq uy bu ayblovni “achinarli voqea” deb baholadi.
Saylovdagi g‘alaba: Kim kimga bog‘liq edi?
Tramp o‘zining saylovdagi g‘alabasini doimo faxr bilan eslab keladi. Mask esa bu borada: “Agar men bo‘lmaganimda, Tramp saylovda yutqazgan bo‘lardi. Demokratlar Vakillar Palatasini, Senatda esa 51-49 ustunlikni qo‘lga kiritgan bo‘lardi”, deb yozdi. So‘ngra esa: “Bunday noshukrlik,” deb tanbeh berdi.
Bu Tramp uchun eng nozik mavzulardan biri. U har doim o‘z yutug‘ini buyuk deb ataydi va uni shaxsiy muvaffaqiyati deb biladi. Mask esa bu pozitsiyani shubha ostiga oldi.
Tramp: Mask aslida shaxsiy manfaatini o‘ylayapti
Trampning fikricha, Maskning qonunga bo‘lgan qarshiligi uning Tesla kompaniyasining manfaatlariga bog‘liq. Tramp EV (elektr transport vositalari) subsidiyalarining qisqartirilgani Maskni g‘azablantirganini aytdi. Mask esa bunga javoban: “Imtiyozlarni qisqartiring, muammo emas. Ammo qonundagi keraksiz moliyaviy chiqimlarni olib tashlang,” dedi.
Mask ilgari ham EV subsidiyalariga qarshi chiqqanini eslatdi. U hatto Trampning o‘zi ham ilgari “Mask mendan hech narsa so‘ramagan,” degan videoni joylashtirdi.
Tramp: Mask qarshilik bildirmagan edi
Trampning aytishicha, Mask qonun loyihasini yaxshi bilgan va unga hech qanday norozilik bildirmagan. “U hammasini bilardi. Undan keyin birdaniga norozilik qila boshladi,” dedi Tramp. Mask esa buni inkor qilib, qonun kechasi yashirincha qabul qilinganini va o‘zi uni ko‘rmaganini aytdi.
Mask: “Menda hali 40 yil, Tramp esa atigi 3,5 yil bor”
Mask siyosatchilarga “X” platformasida ochiqcha tahdid qildi. “Trampning bor-yo‘g‘i 3,5 yili bor, lekin men 40+ yil”, deb yozdi u. Ya’ni, Mask uzoq muddatli ta’sirga ega ekanini eslatib, qonun chiqaruvchilardan ehtiyotkorlikni talab qildi.
Tramp: “Maskning davlat shartnomalarini bekor qilaylik”
Tramp keyinchalik “Truth Social”da Maskning barcha hukumat shartnomalarini bekor qilishni taklif qildi. Bu esa NASA va boshqa muhim dasturlar taqdiri bilan bog‘liq. Bir foydalanuvchi ISS (Xalqaro fazo stansiyasi) taqdiri xavf ostida qolishini aytgach, Mask bu postni “X”da baham ko‘rib, “Qiling, hayotimdagi eng yaxshi kun bo‘ladi,” deb javob qaytardi.
U hatto muhim kosmik loyihalardan birini bekor qilishni boshlashini e’lon qildi.
Laylo Hikmatullayeva tayyorladi
