Germaniyada bolalar uchun ijtimoiy tarmoqlar taqiqlanishi mumkin
Germaniyalik siyosatchi bolalarni ijtimoiy tarmoqlardan himoya qilishga chaqirdi.
Germaniyaning Shlezvig-Golshteyn federal shtati Bosh vaziri Daniel Gyunter 16 yoshgacha bo‘lgan bolalar uchun ijtimoiy tarmoqlardan foydalanishni taqiqlash tarafdori ekanini bildirdi.
Gyunterning ta’kidlashicha, nazorat qilinmagan ijtimoiy tarmoqlar bolalarni zo‘ravonlik, jinsiy zo‘ravonlik sahnalari hamda soxta yangiliklar kabi xavfli kontentga duchor qiladi.
“Davlat sifatida biz bolalarni himoya qilish borasida oxirgi yillarda o‘z vazifamizni yetarlicha bajarmadik. Endi esa vaziyatni o‘zgartirish va 16 yoshgacha bo‘lgan bolalarni ijtimoiy tarmoqlarsiz tarbiyalash uchun qat’iy choralar ko‘rish vaqti keldi”, — dedi siyosatchi.
U aynan qaysi platformalarga kirishni cheklash kerakligini aniqlab, Facebook, Instagram va TikTok kabi mashhur ijtimoiy tarmoqlarni tilga oldi. “Ular juda keng tarqalgan, va aynan shuni bizga tartibga solishimiz zarur”, — deya qo‘shimcha qildi Gyunter.
Bosh vazir, shuningdek, Germaniyada yoshlar orasida zo‘ravonlik holatlari ortib borayotganini ta’kidlagan. Unga ko‘ra, ba’zan 15–16 va hatto undan kichik yoshdagi yoshlar ham qurol bilan hujum qilmoqda.
“Agar biz qat’iy qoidalarni joriy qilsak, bu holatni nazorat qilishimiz mumkin. Bu erkinlikni cheklash emas, balki bolalarni himoya qilishdir”, — deya xulosa qildi Gyunter.
