Rossiyada ko‘p farzandli oilalarga foizsiz uy-joy krediti beriladi
Ushbu taklif hali qonun darajasiga ko‘tarilmagan.
Rossiyada tug‘ilish ko‘rsatkichini oshirish uchun ko‘p farzandli oilalarga foizsiz uy-joy krediti berish taklif qilindi. Bu tashabbus bilan Tatariston bolalar huquqlari bo‘yicha vakili Irina Volynets chiqdi. Unga ko‘ra, ko‘plab oilalar uy-joy muammosi tufayli farzandli bo‘lishga shoshilmayapti.
Volynetsning fikricha, birinchi farzand tug‘ilganda oilalarga foizsiz kredit berilishi kerak. Har keyingi farzand tug‘ilgani sari qarzning bir qismi davlat tomonidan yopiladi. Masalan, ikkinchi farzand uchun – 25 foiz, uchinchi uchun – yana 25 foiz.
Agar oilada to‘rtinchi farzand tug‘ilsa, qolgan kredit butunlay yopiladi. Shu tarzda oilalar moliyaviy og‘irliksiz uy-joyga ega bo‘lish imkoniga ega bo‘ladi.
Ushbu taklif hali qonun darajasiga ko‘tarilmagan, biroq u ijtimoiy tarmoqlarda va OAVda keng muhokama qilinmoqda. Taklif rasmiy darajada ko‘rib chiqilsa, ko‘p farzandli oilalar uchun muhim yordam bo‘lishi mumkin.
