AQShda chaqaloqlar nomiga sarmoya hisoblari ochiladi
2025-yilda tug'ilgan har bir amerikalik chaqaloqqa 1000 dollar beriladi.
AQSh prezidenti Donald Tramp yangi federal dasturni e’lon qildi. Unga ko‘ra, 2025-yildan boshlab tug‘iladigan har bir amerikalik chaqaloq nomiga hukumat tomonidan moliyalashtiriladigan boshlang‘ich kapitali 1000 AQSh dollari bo‘lgan investitsiya hisobvarag‘i ochiladi. Ushbu taklif yetakchi biznes vakillari tomonidan keng qo‘llab-quvvatlandi.
Ma’lumotlarga ko‘ra, Tramp Oq uyda Uber, Goldman Sachs va Dell Technologies kabi yirik kompaniyalar rahbarlari ishtirokidagi davra suhbatida “Tramp hisoblari” deb nomlangan yangi tashabbusni taqdim etgan. Ushbu hisobvaraqlar qimmatli qog‘ozlar bozori bilan bog‘liq bo‘lib, soliq to‘lovlari kechiktirilgan investitsiyalarni o‘z ichiga oladi.
Dastur 2024-yil 31-dekabrdan keyin va 2029-yil 1-yanvargacha tug‘ilgan chaqaloqlarni qamrab oladi. Har bir bola nomiga ochiladigan hisobvaraq federal hukumat tomonidan bir martalik 1000 dollarlik badal bilan to‘ldiriladi. Bundan tashqari, bu hisobga yiliga 5000 dollargacha shaxsiy mablag‘ kiritish imkoniyati ham yaratiladi. Hisoblar vasiylar nazorati ostida bo‘ladi.
Donald Tramp bu tashabbusni “oilalarni qo‘llab-quvvatlash va kelajak avlod iqtisodiy imkoniyatlarini kengaytirish” deb baholadi.
Bunday dasturlar boshqa mamlakatlarda ham uchragan. Masalan, Buyuk Britaniyada 2002–2011-yillarda davlat tomonidan moliyalashtirilgan bolalar ishonch fondi faoliyat yuritgan. Shuningdek, Singapurda bolalar uchun maxsus jamg‘arma hisobvaraqlari bilan bog‘liq davlat dasturi mavjud.
