AQSh-Xitoy o'rtasida savdo kelishuvi rejalashtirilmoqda
Tomonlar savdo cheklovlarini yumshatish bo‘yicha kelishishdi.
AQSh va Xitoy rasmiylari o‘zaro savdoni erkinlashtirish borasida muhim kelishuvga erishdilar. Londonda bo‘lib o‘tgan muzokaralar chog‘ida tomonlar savdodagi qator cheklovlarni bekor qilish hamda Xitoydan noyob tuproq metallarini yetkazib berishni ta’minlash bo‘yicha harakatlar rejasini ishlab chiqishdi.
Bu haqda AQSh savdo vaziri Govard Latnik xorijiy OAVga bergan intervyusida ma’lum qildi. Uning so‘zlariga ko‘ra, tomonlar "Jeneva konsensusini amalga oshirish bo‘yicha" kelishuvga erishgan.
“Biz savdo-sotiqdagi ziddiyatlarni yumshatish hamda strategik xomashyolar, xususan, noyob tuproq metallarining barqaror yetkazib berilishini ta’minlash bo‘yicha amaliy choralar rejasini ishlab chiqdik,” — dedi Latnik.
Mazkur harakatlar rejasi yaqin kunlarda AQSh prezidenti Donald Tramp va Xitoy yetakchisi Si Tszinpinga taqdim etilishi kutilmoqda. Bu qadam ikki davlat o‘rtasidagi uzoq yillik savdo nizolarini yumshatish va global bozorlar barqarorligini ta’minlashda muhim rol o‘ynashi mumkin.
