Dubayda dunyoning eng baland metro stansiyasi quriladi
74 metrli metro stansiya 2029-yilda ishga tushiriladi.
Dubay o‘zining yana bir ulkan arxitektura loyihasi bilan diqqat markazida bo'lmoqda. Shaharda dunyoning eng baland metro stansiyasi barpo etiladi. Bu inshoot 74 metr balandlikka ega bo‘ladi va 2029-yilda ochilishi rejalashtirilgan.
Yangi “Moviy tarmoq” metro liniyasining qurilishi Dubayning shimoli-sharqiy qismini rivojlantirish, tirbandlikni kamaytirish hamda xalqaro aeroport bilan uzviy bog‘lanishni ta’minlashni maqsad qilgan.
Metro stansiyasining dizayni Skidmore, Owings & Merrill (SOM) arxitektura kompaniyasi tomonidan ishlab chiqilgan. Aynan ushbu kompaniya ilgari Burj Xalifa, Nyu-Yorkdagi Olimpiya minorasi va Chikagodagi Sears minorasi kabi muhtasham loyihalar ustida ishlagan.
Yangi Emaar Properties stansiyasi har kuni 160 ming yo‘lovchini qabul qilish imkoniyatiga ega bo‘ladi. 2040-yilga borib, bu raqam 200 ming nafarga yetishi kutilmoqda. Arxitektorlar stansiyani shahar landshaftiga uyg‘unlashtirib, "Dubay – kelajakka kirish eshigi" kontseptsiyasini amalda ifodalashga intilmoqda.
“Moviy tarmoq” 30 km masofani bosib o‘tib, 14 ta yangi stansiyani birlashtiradi. Yo‘lovchilarni 28 ta zamonaviy poezd tashiydi. Bu liniya orqali har ikki yo‘nalishda soatiga 46 ming kishi tashilishi mumkin bo‘ladi. 2030-yilga kelib, ushbu ko‘rsatkich 200 ming yo‘lovchigacha yetishi rejalashtirilgan.
Yangi tarmoq qurilishi yakunlangach, Dubay metrosining umumiy uzunligi 131 km ga, stansiyalar soni esa 78 taga yetadi. “Moviy tarmoq” Dubayning to‘qqizta asosiy tumanini birlashtirib, 2040-yilgacha bo‘lajak 1 milliondan ortiq aholiga xizmat qiladi.
Loyiha umumiy qiymati 20,5 milliard dirhamni (taxminan 5,6 milliard dollar) tashkil etadi. Qurilish ishlari uchun tenderni Turkiyaning Mapa va Limak, hamda Xitoyning CRRC kompaniyalari yutib olgan.
Ushbu loyiha Dubayning 2040-yilgacha mo‘ljallangan umumiy rivojlanish strategiyasi bilan bevosita bog‘liq bo‘lib, zamonaviy transport infratuzilmasi orqali kelajak shahrini yaratishga qaratilgan navbatdagi muhim qadamlardan biridir.
