Suriyaning shimoli-g‘arbiy qismiga dronlar hujum qildi
Zarbalar oqibatida ikki kishi halok bo‘lgan.
2025-yil 10-iyun kuni Suriyaning shimoli-g‘arbiy qismida dron zarbalari oqibatida avtomobil va motosikl nishonga olingan, natijada ikki kishi halok bo‘lgan. Bu haqda Arab News axborot agentligi xabar berdi.
Hujumlar Idlib viloyatida sodir bo‘lgan. Mazkur ikki dron zarbasi uchun hech bir guruh javobgarlikni o‘z zimmasiga olmagan. Biroq, ma’lumki, bu hududda ilgari ham AQSH boshchiligidagi xalqaro koalitsiya tomonidan terrorchi guruhlarga qarshi zarbalar berilgan.
2025-yil boshida AQSH “Al-Qoida”ning Suriya bo‘linmasi — “Xurras ad-Din” rahbariyatiga qarshi amaliyot o‘tkazganini va bir nechta qo‘mondonlar yo‘q qilinganini bildirgan edi. Ayni guruh o‘tgan yil oxirida Bashar Asad hokimiyatdan ag‘darilgach, isyonchilar tomonidan tuzilgan muvaqqat hukumat buyrug‘i bilan tarqatib yuborilayotganini ma’lum qilgan edi.
Shuningdek, Suriyada AQSH qo‘shinlari hanuzgacha “Daish” (ISIS) terrorchilik guruhiga qarshi kurashish maqsadida xalqaro koalitsiya tarkibida faoliyat yuritmoqda.
May oyida Ar-Riyodda bo‘lib o‘tgan sammitda AQSH prezidenti Donald Tramp suriyalik yangi yetakchi Ahmad Ash-Shara’ani “Daish”ning qayta faollashuviga yo‘l qo‘ymaslikda Vashingtonga yordam berishga chaqirgan.
