6 yil davom etgan havodagi firibgarlik fosh bo‘ldi
Aviakompaniyalarni aldagan erkak yillar davomida bepul uchib yurgan.
AQShning Janubiy Florida shtatida yashovchi 35 yoshli Tayron Aleksandr o‘zini aviakompaniya xodimi sifatida tanishtirib, 6 yil davomida samolyotlarda bepul parvozlar qilganlikda ayblanmoqda. Unga nisbatan firibgarlik va xavfsizlik zonasiga noqonuniy kirish bo‘yicha jinoyat ishi ochilgan. Aleksandr 30 yilgacha ozodlikdan mahrum etilishi mumkin.
Xabarlarga ko‘ra, 2018-yildan 2024-yilgacha u yettita yirik AQSh aviakompaniyasining tizimiga kirib, o‘zini styuard, ba'zida hatto uchuvchi sifatida ko‘rsatgan. Shu tarzda u 120 dan ortiq reysda tekinga parvoz qilgan.
Tergov ma’lumotlariga ko‘ra, Aleksandr soxta ko‘krak nishonlari raqamlari, uydirma ishga qabul qilingan sanalar va boshqa yolg‘on ma’lumotlar orqali aviakompaniyalarning ichki bron tizimlariga kirgan. U maxsus xodimlar uchun mo‘ljallangan imkoniyatlardan foydalangan, biroq yillar davomida bu faoliyat deyarli fosh etilmagan.
Ushbu holat aviatsiya tizimlarining axborot xavfsizligi va ichki nazorat mexanizmlari borasida keskin savollar tug‘dirdi. Firibgarning qanday aniqlangani hozircha ochiqlanmagan.
Mazkur voqea Stiven Spilbergning “Iloji bo‘lsa, meni tut” (Catch Me If You Can) nomli mashhur filmidagi syujetni eslatadi. Unda bosh qahramon Frenk Abagneyl ham 1960-yillarda o‘zini uchuvchi sifatida ko‘rsatib, bir necha yil davomida firibgarlik qilgan edi. Aftidan, bu film Aleksandrga ham "ilhom" bo‘lgan ko‘rinadi.
