Hindistonda yo‘lovchi samolyoti halokatga uchradi
Samolyot aholi turar joy hududiga qulagan.
Air India aviakompaniyasiga tegishli yo‘lovchi samolyoti Hindistonning Ahmadobod shahridan Londonga parvoz qilish chog‘ida halokatga uchradi. Samolyot havoga ko‘tarilganidan bir necha daqiqa o‘tib, Gujarot shtatidagi Meganinar tumanidagi turar joy hududiga qulagan.
Dastlabki ma’lumotlarga ko‘ra, bortda 232 nafar yo‘lovchi va 12 nafar ekipaj a’zosi bo‘lgan. Halokat joyidan ko‘tarilgan qora tutun bir necha kilometr uzoqlikdan ham ko‘zga tashlandi. Hududdagi yo‘llar vaqtincha yopilgan, qutqaruv ishlariga ko‘plab xizmatlar jalb etilgan.
Air India kompaniyasi hodisa yuz berganini tasdiqladi va hozirda voqea tafsilotlarini aniqlayotgani haqida ma’lumot berdi. Samolyot AI171 reysi bo‘lib, Ahmadobod – London (Gatvik) yo‘nalishida parvoz qilayotgan edi. Rasmiylar halokat sabablari va jabrlanganlar soni haqida keyinroq ma’lumot berishini bildirgan.
