Janubiy Afrikada kuchli qor va yomg‘ir yog'ishi kuzatilmoqda
Oqibatda 49 kishi halok bo'lgan.
Janubiy Afrikaning Sharqiy Keyp provinsiyasida kuchli yomg‘ir va qor yog‘ishi oqibatida suv toshqinlari yuzaga kelib, kamida 49 kishi halok bo‘ldi. Al-Jazira xabariga ko‘ra, fojia asosan tog‘li hududlarda ro‘y bergan bo‘lib, ko‘plab yo‘llar yopilib, elektr ta’minoti uzilgan.
Sharqiy Keyp gubernatori Lubabalo Oskar Mabuyane matbuot anjumanida maktab avtobusi suvga oqib ketgani natijasida olti o‘quvchi halok bo‘lgani, to‘rt nafari bedarak yo‘qolgani va uch nafari qutqarib qolinganini ma’lum qildi. U, shuningdek, ko‘chki va yo‘llardagi tirbandliklar qutqaruv ishlarini jiddiy qiyinlashtirayotganini aytdi.
Tabiiy ofat natijasida mamlakat janubi va sharqida yuz minglab uylar elektr energiyasiz qoldi. Rasmiy ma’lumotlarga ko‘ra, taxminan 500 kishi vaqtinchalik boshpanalarga ko‘chirilgan. Qutqaruv ishlari hozirda davom etmoqda.
