Tramp yangi karta dasturini e’lon qildi
“Oltin karta” olishni istaganlar uchun veb-sayt ochildi.
AQSh prezidenti Donald Tramp xorijlik investorlar uchun mo‘ljallangan yangi immigratsiya loyihasini taqdim etdi. U 5 million dollar miqdoridagi sarmoya evaziga beriladigan eksklyuziv “Tramp Card” — ya’ni "Oltin karta" dasturiga bag‘ishlangan TrumpCard.gov veb-saytining ishga tushirilganini e’lon qildi.
Tramp ijtimoiy tarmoqlarda yangi platformaga qiziqish yuqori ekanini ta’kidladi: “Minglab odamlar roʻyxatdan oʻtish va bogʻlanish bo‘yicha savollar berishmoqda”, — dedi u.
Ushbu tashabbus an’anaviy “yashil karta” (Green Card) dasturiga muqobil sifatida ko‘rilmoqda. “Tramp Card” elit toifadagi xorijliklar, ayniqsa, katta miqdorda investitsiya kiritishga tayyor shaxslar uchun mo‘ljallangan.
Eslatib o‘tamiz, Tramp ushbu kartaning ilk namunasini 2025-yil aprel oyida, “Air Force One” samolyoti bortida namoyish qilgan edi. U hujjat prototipini faxr bilan ko‘rsatib, kartalar ikki haftadan kam muddatda tayyor bo‘lishini va’da qilgandi.
Hozircha dastur tafsilotlari, huquqiy maqomi va amalda qanday ishlashi haqida batafsil ma’lumot berilmagan, ammo bu tashabbus siyosiy va iqtisodiy doiralarda katta rezonans uyg‘otmoqda.
