Xitoy dunyodagi eng katta amfibiya samolyotini ishlab chiqaradi
Xitoy havoda ham, suvda ham harakatlana oladigan ulkan samolyotni taqdim etdi.
Xitoy aviatsiya sanoatida muhim burilish yuz berdi. Mamlakat dunyodagi eng yirik amfibiya samolyoti AG600 ni ommaviy ishlab chiqarishga ruxsat oldi. 11-iyun kuni ishlab chiqarish uchun barcha zarur litsenziyalar qo‘lga kiritilganini Xitoyning Aviatsiya Sanoati Korporatsiyasi (AVIC) rasman tasdiqladi.
AG600 o‘z hajmi bilan ko‘pchilikni hayratga solmoqda: samolyotning uzunligi — 38,9 metr, qanotlar kengligi — 38,8 metr, balandligi esa 11,7 metrni tashkil qiladi. Bu o‘lchamlar uni standart tor-fyuzelyajli yo‘lovchi samolyotlardan ham yirikroq qiladi. U maksimal 60 tonnagacha yuk ko‘tarib, 4500 kilometrgacha masofani bosib o‘tishga qodir.
Mazkur amfibiya samolyoti asosan o‘rmon yong‘inlariga qarshi kurashishda qo‘llaniladi — u bir safarda 12 tonna suv olib, olov o‘chirish ishlarini bajarishi mumkin. Shuningdek, u dengizda qutqaruv, kuzatuv, yo‘lovchi va yuk tashish, hatto geologik razvedka vazifalari uchun ham moslashtirilgan.
AG600 nafaqat Xitoy, balki butun Osiyo aviatsiyasi uchun texnologik yutuq sanaladi. Uning ko‘p funksiyali dizayni kelajakdagi global ekologik va xavfsizlik muammolariga samarali yechim bo‘lishi mumkin.
