Isroillik talabalar bog‘ichlarni bog'lash mashinasini ixtiro qilishdi
Ushbu ixtiro keksa va nogironlar uchun aqlli yordamchi hisoblanadi.
Isroilning Ariel universiteti talabalari keksa va nogiron insonlarga poyabzal bog‘ichlarini bog‘lashda yordam beradigan maxsus qurilma — “Tie-Robot”ni yaratishdi. Loyiha muallifi, 4-kurs talabasi Yam Dahan ushbu g‘oyani 88 yoshli bobosi Devid Kravtsovdan ilhomlanib boshlagan.
“Men bobomni ko‘rgani borganimda, oddiy bog'ich bog‘lash qanchalik og‘ir bo‘lishini o‘z ko‘zim bilan ko‘rdim. Shu paytdan boshlab bu muammoni hal qilishni oldimga maqsad qilib qo‘ydim”, — deydi Dahan.
U o‘z kursdosh do‘stlari Ido Klein va Gilel Landau bilan hamkorlikda “Tie-Robot”ni loyihalashga kirishdi. Biroq, dastlab oddiy ko‘ringan bu vazifa aslida murakkab mexanik yechimlarni talab qilgani ayon bo‘ldi.
“Bog‘ichlarni bog‘lash uchun uch o‘q bo‘ylab sinxron harakatlar zarur. Bu mexanik jihatdan murakkab vazifa”, — deya tushuntirdi muallif.
Jamoa bu murakkablikni soddalashtirish va qurilmani arzonlashtirish yo‘lini topdi. Natijada, “Tie-Robot” bitta tugmani bosish orqali toza kamon yasaydi va bog‘ichlarni bog‘laydi — barchasi foydalanuvchidan deyarli hech qanday harakat talab etmaydi.
Talabalar loyihasi kelajakda keng ommaga mo‘ljallangan innovatsion mahsulotga aylanishi mumkin. Yirik kompaniyalar, jumladan Nike, ilgari poyabzalni avtomatik tozalovchi robotlar ishlab chiqqani, bu yo‘nalishga bo‘lgan qiziqish kuchli ekanini ko‘rsatadi.
Bu kichik ixtiro — oddiy ehtiyojdan tug‘ilgan katta yordamga aylanmoqda.
