Dubaydagi Tiger Tower binosi yonib ketdi
3800 dan ortiq odam evakuatsiya qilingan.
13 iyun kuni kechqurun Dubaydagi mashhur binolaridan biri - Tiger Tower osmono‘par binosida yirik yong‘in sodir bo‘ldi. 3800 dan ortiq odam evakuatsiya qilingan. Jabrlanganlar yo‘qligi aytilmoqda.
Yong‘in mahalliy vaqt bilan soat 21:30 atrofida 67 qavatli binoning yuqori qavatlarida boshlangan. Yong‘in tezda qurilma bo‘ylab tarqalib, turar-joy majmuasining boshqa qismlarini ham qamrab olgan.
Binodan 764 ta xonadonda yashovchi 3820 kishi evakuatsiya qilingan. Rasmiylarning ta’kidlashicha, evakuatsiya muvaffaqiyatli o‘tgan, jabrlanganlar haqida ma’lumot berilmagan.
Yong‘in sababi hozircha noma’lumligicha qolmoqda. Favqulodda vaziyatlar vakillari hodisa tafsilotlarini o'rganmoqda.
