Eronda Natanzdagi zarbadan so‘ng ichki radiatsiya aniqlangan
Bu haqda atom energiyasi bo‘yicha xalqaro agentlik bosh direktori ma’lum qildi.
Atom energiyasi bo‘yicha xalqaro agentlik (MAGATE) bosh direktori Rafael Grossi Isroil tomonidan Erondagi Natanz uran boyitish markaziga uyushtirilgan hujumdan so‘ng inshoot ichida alfa-zarralar ajralib chiqqanini ma’lum qildi.
Grossining aytishicha, inshoot tashqarisidagi radiatsiya darajasi o‘zgarmagan va mavjud himoya choralar bilan nazorat qilinmoqda. U, shuningdek, har qanday holatda ham yadroviy inshootlarga hujum qilinmasligi kerakligini qat’iy ta’kidladi.
“Bunday hujumlar nafaqat atrof-muhit, balki butun insoniyat uchun xavf tug‘diradi. Bu holatlar global yadro xavfsizligi, mintaqaviy va xalqaro tinchlik uchun og‘ir oqibatlarga olib kelishi mumkin”, — dedi Grossi.
Eron Atom energiyasi tashkiloti rahbari Muhammad Islomi esa Natanzdagi inshootga yetgan zarar katta emasligini bildirib, radiatsiya sizib chiqishi holati aniqlanmaganini ta’kidladi. Unga ko‘ra, zarar faqat mahalliy darajada bo‘lgan va qurbonlar yo‘q.
