Turkiyada ikkita havo shari qulab tushdi
Havo sharining qulashiga kuchli shamol sabab bo‘lgan.
Turkiyaning mashhur turistik mintaqasi Kapadokiyada ikki havo shari qulab tushdi. Aksaray viloyatida yuz bergan ushbu hodisada bir kishi halok bo‘ldi, yana 12 kishi tan jarohati olgan.
Mahalliy ommaviy axborot vositalari xabarlariga ko‘ra, halok bo‘lgan shaxs 37 yoshli shar uchuvchisi bo‘lib, u shar qo‘nayotganda savat ostida qolib ketgan. Jabrlanganlar orasida Indoneziyalik sayyohlar bo‘lgan.
Voqea joyiga zudlik bilan politsiya, qutqaruvchilar va o‘t o‘chirish brigadalari yetib kelgan. Yaradorlar yaqin kasalxonaga yetkazilgan, ularning ahvoli yengil deb baholanmoqda.
Rasmiylarning ma'lumotlariga ko‘ra, havo sharlarining parvozi tonggi soat 5:00 atrofida, mashhur Ixlara vodiysidan boshlangan. Taxminan 7:00 da esa kuchli va keskin shamol boshlanib, ikkala sharni boshqaruvdan chiqargan. Qancha balandlikdan qulagani haqida hozircha rasmiy ma’lumot berilmagan.
