Rossiyada erkak aql tishini oldirgandan so‘ng vafot etdi
Shifokorga nisbatan jinoiy ish qo’zg’atildi.
Rossiyaning Perm shahrida 35 yoshli Yevgeniy Kunavin oddiy tibbiy amaliyot — aql tishini oldirish jarayonidan so‘ng og‘ir asoratlar tufayli vafot etdi. Operatsiyadan keyin infeksiya rivojlanib, sepsisga olib kelgan.
U bir yarim hafta reanimatsiyada sun’iy nafas olish apparatiga ulangan holda davolangan, biroq komaga tushib hayotdan ko‘z yumgan. Marhumdan rafiqasi va ikki nafar farzandi yetim qoldi.
Mazkur holat bo‘yicha Rossiya Jinoyat kodeksining 109-moddasi 2-qismi (“Ehtiyotsizlik oqibatida o‘limga sabab bo‘lish”) asosida jinoyat ishi qo‘zg‘atildi. Tergovchilar tibbiy xatolik yuzasidan tekshiruv ishlarini olib bormoqda.
Hozircha shifokorning ismi oshkor etilmagan, biroq tibbiy amaliyotda ehtiyotsizlik yoki noto‘g‘ri muolaja holatlari yuz bergan-bermaganini aniqlash maqsadida ekspertiza tayinlangan.
