Trump brendi ostida oltin rangli smartfon taqdim etiladi
Smartfon 499 dollarga sotiladi.
AQSH prezidenti Donald Trampning oila biznesi — Trump Organization, 499 dollarlik oltin rangli smartfon va oyiga 47,45 dollar turadigan mobil xizmatni taqdim etmoqda. Qurilma va xizmat Trampning 45 va 47-prezidentlik raqamlari sharafiga chiqarilayotgani aytilgan.
Tashkilot Trampning farzandlari boshqaruvida bo‘lib, bu qaror ehtimoliy manfaatlar to‘qnashuvi va korrupsiya xavotirlariga sabab bo‘lmoqda. Citizens for Responsibility and Ethics vakili Megan Folkner bu orqali Tramp oilasi yana foyda olish yo‘lini topganini tanqid qildi.
Yangilik Tramp Apple rahbari Tim Kukni iPhone’larni AQSHda ishlab chiqarishga undayotgan vaqtda e’lon qilindi. Prezident ilgari chet elda ishlab chiqarilgan telefonlarga 25% lik boj solig‘i joriy etishni taklif qilgan edi.
Trump telefoni uchun mijozlarga xizmat ko‘rsatish xizmati yo‘lga qo‘yiladi va qurilmaga oldindan buyurtma berish allaqachon boshlangan.
