Isroil qattiq senzura joriy qildi
Muxbirlarga reportaj olib borish taqiqlandi.
Isroil politsiyasi Eron zarbasidan keyin Xayfa shahrida xorijiy jurnalistlarga reportaj olib borishni qat’iyan taqiqladi. Bu hududda mamlakatdagi eng yirik neftni qayta ishlash zavodiga zarba berilgani aytilmoqda.
Huquqni muhofaza qiluvchi organlar gorizont chizig‘ini suratga olayotgan bir nechta muxbirlarni hibsga olib, ularning texnik vositalari va uskunalarini musodara qilgan. Ushbu choralar xavfsizlik nuqtayi nazaridan zarur, deb izoh berilgan.
Avvalroq Isroil Mudofaa armiyasi fuqarolarga zarba berilgan joylar va u yerda yetkazilgan zararning surat hamda videolarini e’lon qilishni man etgan edi. Bu ogohlantirish strategik obyektlarga oid tasvirlar ommaga tarqalganidan so‘ng joriy qilingan.
Ekspertlarga ko‘ra, bu senzura Isroilning strategik inshootlarini ommaviy axborot vositalarida yoritilishidan himoyalashga qaratilgan bo‘lib, xavfsizlik tahdidlari kuchaygan sharoitda amalga oshirilmoqda.
