Namibiyada SIM-kartasiz ishlaydigan telefon yaratildi

Namibiyalik yosh ixtirochi Simon Petrus SIM-karta va efir vaqti (airtime) talab qilmaydigan mobil telefonni yaratdi. Mazkur telefon an’anaviy uyali aloqa tarmoqlaridan foydalanmasdan, radiochastotalar orqali bevosita qo‘ng‘iroqlarni amalga oshirish imkonini beradi. Qurilma mustaqil aloqa tizimi sifatida ishlaydi va har qanday tarmoq, trafik yoki SIM-kartaga ehtiyoj sezmaydi.

 

Simon Petrus bu loyihani talabalik davrida, qayta ishlangan eski elektron qurilmalar – uy telefoni, televizor va ikki tomonlama radiolardan foydalanib yaratgan. U telefonni qisqa to‘lqinli chastotalarda ishlaydigan aloqa qurilmasi sifatida ishlab chiqqan.

 

Telefonning yana bir jihati – u qo‘shimcha funksiyalarni ham o‘z ichiga oladi. Qurilmaga kichik televizor, LED chiroq, ventilyator va USB quvvatlash portlari o‘rnatilgan. Ularning barchasi bitta oddiy radiatorli tizim orqali quvvatlanadi.

 

Simon Petrus ixtirosini ilk bor maktab ilmiy yarmarkasida taqdim etib, keng jamoatchilik e’tiborini qozongan va mukofot sohibi bo‘lgan. Shundan so‘ng u mahalliy hamda xalqaro ommaviy axborot vositalarining ham diqqat markaziga tushgan.

 

Biroq Petrus o‘rta maktabdan keyin oliy ta’limga kirishda qiyinchiliklarga duch kelgan. U 2023-yilda elektronika muhandisligi bo‘yicha diplom olganiga qaramay, hozirda ishsiz ekani aytilmoqda. Uning telefon ixtirosi hali tijoratlashtirilmagan va bozorga chiqarilmagan.