Xakerlar Eronning yirik kriptovalyuta birjasiga hujum qilishdi
Xakerlar maxfiy ma’lumotlarni oshkor qilmoqchi.
Isroilni qo‘llab-quvvatlovchi "Gonjeshke Darande" (yoki “Yirtqich chumchuq”) nomli xakerlar guruhi Eronning eng yirik kriptovalyuta birjasi — Nobitex ga qarshi kiberhujum uyushtirganini e’lon qildi. Bu haqda Isroilning Ynet News nashri xabar berdi.
Xakerlar bayonotida ta’kidlanishicha, hujum Eronning yetakchi banklaridan biri buzilganidan bir kun o‘tib amalga oshirilgan. Guruh Nobitexni terroristik faoliyatni moliyalashtirishda va raqamli valyutalar yordamida xalqaro sanksiyalarni chetlab o‘tishda ayblagan.
Shuningdek, xakerlar birjaning barcha ichki ma’lumotlarini 24 soat ichida oshkor qilish bilan tahdid qilgan. Ularning da’volariga ko‘ra, bu ma’lumotlar tizimning moliyaviy operatsiyalari va foydalanuvchilar bilan bog‘liq maxfiy tafsilotlarni o‘z ichiga oladi.
Hozircha Nobitex rasmiy javob bermagan, ammo Eron axborot xavfsizligi organlari holatni o‘rganmoqda.
