Yevrokomissiya Rossiya gazidan butunlay voz kechmoqchi
Hozirgi mavjud import shartnomasi 2028-yilgacha amal qiladi.
Yevrokomissiya 2028-yilga borib Rossiyadan gaz importini to‘liq to‘xtatishni rejalashtirmoqda. Ushbu rejaga ko‘ra, barcha Yevropa Ittifoqiga a’zo davlatlar Rossiya gazi xaridini butkul to‘xtatadi.
Bu tashabbus YeIning energetik mustaqilligini oshirish, shuningdek, geosiyosiy xavfsizlikni ta’minlash maqsadida ilgari surilgan. Komissiyaning fikricha, Rossiyadan energiyaga bog‘liqlik Yevropaning siyosiy va iqtisodiy xavfsizligiga tahdid solmoqda.
Rejada muqobil energiya manbalarini rivojlantirish, suyuq gaz (LNG) importini kengaytirish va qayta tiklanuvchi energiya turlariga o‘tishni jadallashtirish nazarda tutilgan.
Hozircha ba’zi a’zo davlatlar bu rejaning amalga oshirilish muddati va iqtisodiy oqibatlari borasida ehtiyotkorlik bilan munosabat bildirmoqda. Shu bilan birga, Yevrokomissiya rejani bosqichma-bosqich amalga oshirishga va zaruriy infratuzilmani yaratishga va’da bermoqda.
