AQSH talabalar vizasini tiklashda yangi tekshiruv joriy qiladi
Vizaga da'vogarlarning ijtimoiy tarmoqlari tekshiriladi.
AQSH Davlat departamenti may oyida to‘xtatilgan talabalar vizasi uchrashuvlarini qayta boshlash bo‘yicha ko‘rsatma berdi.
Endilikda elchixonalar vizaga murojaat qiluvchilarning ijtimoiy tarmoqlardagi faolligini ham tahlil qiladi. Ariza topshirayotganlardan ijtimoiy media profillarini ochiq saqlash so‘raladi. Faollikning yashirilishi yoki cheklanishi — shubhali faoliyat belgisi sifatida baholanishi mumkin.
Yangi nizomga ko‘ra, AQSH fuqarolari, hukumati yoki jamiyatiga salbiy munosabat bor-yo‘qligi ko‘rib chiqiladi. Vizaga da’vogarlarning har qanday onlayn izi — ijtimoiy tarmoq, qidiruv tizimlari, va mavjud ma’lumotlar bazalari orqali tekshiriladi.
Bu talablar yangi va qayta kirayotgan talabalarga — F, M va J turidagi vizalar uchun amal qiladi.
Avvalroq Tramp ma’muriyati xalqaro talabalarni cheklovchi siyosat olib borgan, ba’zilarining vizalari bekor qilingan, xususan Garvard universiteti nishonga olingan edi.
