Bali orolida vulqon otildi
Holat sababli 26 ta reys bekor qilindi.
Indoneziyaning Bali orolida vulqonning faol otilishi tufayli kamida 26 ta xalqaro va mahalliy aviaqatnovlar bekor qilindi yoki kechiktirildi. Transport vazirligi ma’lumotiga ko‘ra, bu holat 14 mingdan ortiq yo‘lovchining rejasiga ta’sir ko‘rsatdi.
Chorshanba kuni ertalab vulqon 1 kilometr balandlikka kul bulutini havoga chiqarib, xavfli holat yuzaga keltirgan. Shu sababli Denpasar xalqaro aeroporti faoliyatida uzilishlar kuzatildi.
Singapore Airlines Bali va Singapur o‘rtasidagi to‘rtta reysni bekor qilganini ma’lum qildi. Hindiston, Singapur va Avstraliyadan Baliga parvoz qilishi rejalashtirilgan kamida 14 ta reys ta’sirga uchradi.
Rasmiylar vaziyatni diqqat bilan kuzatmoqda va yo‘lovchilarga parvozdan oldin aviatashuvchilar bilan bog‘lanishni tavsiya qilmoqda.
