Bishkekning deyarli barcha tumanlari elektrsiz qoldi
Podstansiyalardan birida avariya yuz bergani aytilmoqda.
Qirg‘iziston poytaxti Bishkekda keng ko‘lamli elektr uzilishi sodir bo‘ldi. Bu haqda TASS axborot agentligi mamlakat Energetika vazirligiga tayanib xabar berdi.
Vazirlik vakilining aytishicha, dastlabki taxminlarga ko‘ra, podstansiyalardan birida avariya yuz bergan. Mutaxassislar ayni damda elektr ta’minotining uzilishiga nima sabab bo‘lganini aniqlash ustida ishlamoqda.
Bishkek bilan birga unga tutash joylashgan Chuy viloyatining ayrim hududlari ham elektr energiyasidan uzilgan. Aholi muammodan jiddiy ziyon ko‘rmagan bo‘lsa-da, shahar hayotida uzilishlar yuzaga kelgan.
Vazirlik elektr ta’minotini tiklash bo‘yicha ishlar olib borilayotganini ma’lum qildi va fuqarolardan sabr-toqat bilan kutishni so‘radi.
