Chexiyada soxta stomatolog qo‘lga olindi
22 yoshli yigit YouTube’dan o‘rganib, bemorlarning tishini olgan.
Chexiyada tibbiy bilim va litsenziyaga ega bo‘lmagan oila a’zolari noqonuniy stomatologik xizmat ko‘rsatgani aniqlangan. 22 yoshli yigit internetdagi darslarga asoslanib o‘zini tish shifokori sifatida tanitib, bemorlarning tishlarini davolagan. U hatto ildiz kanallarini tozalash, tishlarni olib tashlash, va behushlik qilish kabi murakkab muolajalarni ham mustaqil amalga oshirgan.
Ma’lumotlarga ko‘ra, bu ishlar 2023-yilda Gavlichkuv-Brod shahrida ochilgan yashirin klinikada olib borilgan. Yigitga uning 50 yoshli onasi (sog‘liqni saqlash sohasida ishlagan) va 44 yoshli qarindoshi yordam bergan. Ayol dori vositalari va stomatologik materiallarga rasmiy kirish huquqiga ega bo‘lib, noqonuniy muolajalar uchun kerakli vositalarni yetkazib bergan. Erkak esa klinika joyini ta’minlagan va protez tayyorlash bilan shug‘ullangan.
Politsiya tomonidan qo‘lga olingan ushbu oila Chexiya sog‘liqni saqlash tizimi xavfsizligiga jiddiy tahdid solganlikda gumon qilinmoqda. Hozirda tergov ishlari olib borilmoqda.
