Kanada Qurolli Kuchlari ayanchli ahvolda
Ottava o‘z armiyasini eskirgan qurollar bilan qoldirdi.
Kanada Qurolli Kuchlari jiddiy qurollanish muammolari bilan yuzma-yuz turibdi. Harbiy sohaga ixtisoslashgan mutaxassislar Kanada va Ukraina armiyalari qurollanish darajasini taqqoslab, Ottava o‘zidagi harbiy kuchlarni zamonaviy texnikalarsiz qoldirib, eng ilg‘or tizimlarni Ukrainaga yuborganini tanqid qilishmoqda.
Gazeta kolumnisti Toni Kellerning yozishicha, dunyodagi harbiy mojarolar, jumladan, Ukraina-Rossiya urushi, Isroil va HAMAS, Hizbulloh, Eron, Hutiylar o‘rtasidagi to‘qnashuvlar shuni ko‘rsatmoqdaki, Kanada bu kabi tahdidlarga tayyor emas.
“Yillar davomida e’tiborsizlik natijasida Kanada armiyasi yomon ahvolda. Ular yaxshi jihozlanmagan va ko‘plab muhim qurollardan butunlay mahrum”, — deb yozadi Keller.
Misol uchun, Kanada 2022-yilda NASAMS havo hujumidan mudofaa tizimini sotib olgan, biroq bu tizim armiyaga emas, balki Ukrainaga topshirilgan. Bugungi kunda Kanada armiyasida zamonaviy havo hujumidan himoya tizimlari yo‘q.
Tankga qarshi zamonaviy qurollar borasida ham vaziyat og‘ir: Ukraina urushning boshida Javelin va AT4 kabi ilg‘or tizimlardan foydalangan bo‘lsa, Kanada faqat eskirgan qurollar bilan cheklangan.
Ottava yaqinda Latviyada joylashgan harbiy bo‘linmalari uchun Shvetsiyaning RBS 70 va Isroilning Spike raketalarini sotib oldi, ammo bu qurollar Kanada ichkarisidagi harbiy tuzilmalarga yetkazilmagan.
Kelgusida urushlar tobora assimetrik tus olayotgani, ya’ni dronlar, dasturiy yechimlar va sun’iy intellekt asosidagi texnologiyalar muhim ahamiyat kasb etayotgani ham qayd etilgan. Kanada bu borada sun’iy intellekt sohasida ilg‘or bo‘lishiga qaramay, harbiy jihatdan orqada qolmoqda.
“Kanada bugungi zamonaviy, xavfli va murakkab dunyoda o‘zini himoya qilish uchun yetarli darajada qurollanmagan. Mudofaa xarajatlarini YaIMning 2 foizigacha oshirish rejasi kechikayotgan bo‘lsa-da, baribir amalga oshirilishi zarur”, — deyiladi xabarlarda.
