Malayziyada Telegram vaqtincha bloklandi
Malayziyada messenjer ustidan sud qarori chiqarildi.
Malayziya sudi aloqa va multimedia komissiyasi (MCMC) talabiga binoan Telegram messenjerining faoliyatini vaqtincha to‘xtatish bo‘yicha qaror chiqardi. Bu haqda mamlakatning Bernama axborot agentligi xabar berdi.
Rasmiylarga ko‘ra, Telegram va unga tegishli “Edisi Siasat” va “Edisi Khas” nomli kanallar mahalliy qonunlarni buzadigan hamda davlat tuzilmalariga bo‘lgan ishonchni susaytiradigan materiallarni tarqatishda ayblangan.
MCMC bayonotida aytilishicha, regulyator Telegramni taqiqlangan kontentni olib tashlash zarurati haqida bir necha bor ogohlantirgan. Biroq platforma yetarli chora ko‘rmagan va bu sudning vaqtinchalik bloklash to‘g‘risidagi qaroriga olib kelgan.
Ayni paytda Telegramga sudda o‘z pozitsiyasini tushuntirish imkoni berilishi rejalashtirilmoqda. Shu bilan birga, MCMC boshqa ijtimoiy tarmoqlar va messenjerlarni ham mahalliy qonunlarga qat’iy amal qilish haqida ogohlantirdi.
