Pavel Durov Tramp siyosatini tanqid qildi
Uni ijtimoiy tarmoqlardan bloklashni xavfli deb atadi.
Telegram messenjeri asoschisi Pavel Durov AQSh prezidenti Donald Trampning siyosatini tanqid qilib, u qilgan ishlarning ko‘p qismini ma’qullamasligini bildirdi. Bu haqda u Fransiyaning Le Point gazetasiga bergan intervyusida aytib o‘tdi.
“Men Trampning barcha harakatlarini qo‘llab-quvvatlamayman, lekin uni ijtimoiy tarmoqlardan bloklash — bu katta xato, hattoki juda xavfli hodisa deb hisoblayman. Bu holat muhim bir pretsedent yaratdi”, — dedi Durov.
U 2021-yilda Trampning ijtimoiy tarmoqlarda ommaviy ravishda bloklanishini eslatib o‘tdi. Durovga ko‘ra, o‘sha vaqtda jamoatchilik bunga ruxsat bergani tufayli, endilikda har qanday inson bunday xavf ostida qolishi mumkin.
“Agar bir mamlakatning prezidentini internetdan o‘chirib tashlash mumkin bo‘lsa, oddiy odamlar undan ham ko‘proq himoyasiz qoladi”, — deya qo‘shimcha qildi u.
Durovning bu bayonoti ijtimoiy tarmoqlar va so‘z erkinligi mavzusida davom etayotgan global munozaralarda yana bir bor muhim nuqtaga e’tibor qaratdi.
