Shakar narxi so‘nggi to‘rt yildagi eng past darajaga tushdi
Hindiston va Tailand eksporti shakar narxini pasaytirdi.
London Intercontinental Exchange (ICE) ma’lumotlariga ko‘ra, iyul oyidagi xom shakar fyucherslari narxi 1,6 foizga pasayib, bir funt (0,45 kg) uchun 0,1582 dollarni tashkil etdi. Bu ko‘rsatkich 2021-yil aprelidan buyon eng past daraja sifatida qayd etildi, deb yozadi RBC.
Shu oy boshidan beri shakar narxi 7,2 foizga, joriy yilning 17-martidan esa 21 foizga kamaygan.
Narxlarning tushishiga asosiy sabab sifatida Hindiston va Tailand tomonidan shakar eksporti hajmining ortishi kutilayotgani ko‘rsatilmoqda. Bu mamlakatlar dunyodagi eng yirik shakar ishlab chiqaruvchilari va eksportchilari hisoblanadi.
Ekspertlarning fikricha, yetkazib berish hajmining ortishi global bozorda taklifni ko‘paytirib, narxlar bosimini kuchaytirgan.
