Eronning yadroviy qurol xavfi kuchaymoqda
Eron bir necha hafta ichida yadro qurolini yaratishi mumkin.
AQSh rasmiylari Erondagi yadroviy salohiyat borasida jiddiy xavotir bildirishmoqda. Oq uy matbuot kotibi Kerolin Leavittning so‘zlariga ko‘ra, agar Eron rahbariyati tegishli qaror qabul qilsa, mamlakat “bir necha hafta ichida” yadro qurolini yaratish imkoniyatiga ega.
Ma'lum qilinishicha, Leavitt bu fikrni jurnalistlar uchun o‘tkazilgan navbatdagi brifingda bildirgan.
“Eron yadro qurolini ishlab chiqish uchun barcha zarur texnologik imkoniyatlarga ega. Buning uchun faqat oliy rahbarning ruxsati kerak. Yadro qurolining ishlab chiqarilishi esa bir necha hafta vaqt oladi. Bu holat nafaqat Isroil, balki AQSh va butun dunyo uchun ekzistensial tahdid hisoblanadi”, — dedi Leavitt.
Shuningdek, u xalqaro hamjamiyat, jumladan Rossiya kabi yirik davlatlar ham Eronning yadro quroliga ega bo‘lishiga yo‘l qo‘ymaslik kerakligi borasida yagona fikrda ekanini ta’kidladi.
Avvalroq AQSh prezidenti Donald Tramp ham Eronga qarshi ehtimoliy harbiy zarba berish imkoniyatini istisno qilmagan edi. Oq uy matbuot kotibasi Trumpning bayonotini eslatib, u yaqin ikki hafta ichida zarbalar bo‘yicha qaror qabul qilishi mumkinligini aytib o‘tdi.
