Havo ifloslanishi saratondan xavfliroq bo‘lishi mumkin

 

Buyuk Britaniyada havoning ifloslanishi nafaqat ekologik, balki jiddiy sog‘liqni saqlash va iqtisodiy inqirozga aylangan. Qirollik shifokorlar kolleji tomonidan o‘tkazilgan tadqiqotga ko‘ra, har hafta 500 dan ortiq fuqarolar zaharli havo oqibatida hayotdan ko‘z yumadi. Yillik hisobda bu raqam 30 mingdan ortadi.

 

The Guardian nashrining yozishicha, ushbu fojiali statistika atrof-muhitdagi ifloslanish, mehnat unumdorligining pasayishi, surunkali kasalliklar va sog‘liqni tiklash uchun qilinayotgan ulkan xarajatlarga bog‘liq. Faqat havo ifloslanishining o‘zi haftasiga mamlakat byudjetiga 500 million funt sterlingdan ortiq zarar yetkazmoqda.

 

Tadqiqotlar shuni ko‘rsatadiki, havodagi zararli moddalarning hatto eng past miqdori ham inson organizmiga – ayniqsa yurak-qon tomir, nafas yo‘llari, ruhiy holat va miya faoliyatiga salbiy ta’sir qiladi. Zaharli havo britaniyaliklarning o‘rtacha umrini 1,8 yilga qisqartirishi mumkin.

 

Ekspertlarning ogohlantirishicha, havoning ifloslanishi dunyodagi eng xavfli o‘lim sabablaridan biriga aylanib bormoqda — saraton va chekishdan keyin uchinchi o‘rinda turadi.

 

Shu sababli, tibbiyot mutaxassislari hukumatni bu muammoni milliy sog‘liqni saqlash inqirozi sifatida tan olishga va qat’iy choralar ko‘rishga chaqirmoqda. Rasmiy raqamlarga ko‘ra, har yili mamlakat iqtisodiyoti atrof-muhit sababli 27 milliard funt sterling zarar ko‘radi.

 

Britaniya hukumati javoban 575 million funt ajratilganini bildirgan va bu yo‘nalishda kompleks chora-tadbirlar ishlab chiqilayotganini ma’lum qilgan. Biroq ekspertlar bu yetarli emasligini va muammo tubdan hal qilinmaguncha inson salomatligiga xavf saqlanishini ta’kidlamoqda.