Oxirgi kunlarda qancha eronlik yadro olimi halok bo'ldi?
Bu haqda Isroil mahalliy telekanallari xabar bergan.
2025-yil 13-iyundan boshlab Isroil Eron hududida to‘g‘ridan-to‘g‘ri harbiy zarbalarni boshladi. Isroilning Channel 12 telekanali xabariga ko‘ra, bu hujumlar natijasida 17 nafar yetakchi eronlik yadro olimi halok bo‘lgan.
Halok bo‘lgan olimlarning aksariyati maxsus himoyalangan “xavfsiz uylar”da nishonga olingan. Shu vaqt ichida Eron hukumati ham o‘nlab josuslar va agentlarni qo‘lga olganini e’lon qilgan.
Ayni damda Isroil harbiy-havo kuchlari Eron janubi-g‘arbidagi harbiy infratuzilmalarga zarba bermoqda. Shuningdek, Sheroz, Qum va Isfahon kabi yirik shaharlardagi harbiy va yadroviy obyektlar ham hujumga uchragan.
Qumdagi zarbalar oqibatida ikki kishi, jumladan, 16 yoshli o‘smir halok bo‘lgan, to‘rt kishi yaralangan. Isfahonda esa portlashlar va havo mudofaa tizimlarining faollashgani qayd etilgan. Mazkur hududda Eronning eng yirik yadroviy tadqiqot majmuasi joylashgan.
