BAA, Qatar, Quvayt havo hududini yopdi

 

Yaqin Sharqdagi geosiyosiy vaziyat tobora keskinlashar ekan, Birlashgan Arab Amirliklari (BAA) Qatardan so‘ng o‘z havo hududini fuqaro aviatsiyasi uchun vaqtincha yopdi. Bu qaror Eronning AQSh harbiy obyektlariga javob zarbalari berishi mumkinligi fonida qabul qilindi.

 

Eron rasmiylari AQShning yadroviy obyektlarga qilgan so‘nggi hujumlari uchun “to‘g‘ridan-to‘g‘ri javob” berilishini bildirar ekan, asosiy nishon sifatida Qatardagi Al-Udeyd harbiy aviabazasini tilga olishdi. Bu yerda 10 mingdan ortiq AQSh harbiy xizmatchilari, strategik aviatsiya va muhim texnikalar joylashtirilgan. Shunga qaramay, BAA havo hududining yopilishi mintaqadagi boshqa AQSh obyektlarining, xususan, Dubay va Abu-Dabi yaqinidagi Al-Dhafra aviabazasi hamda Jebel Ali portining ham xavf ostida ekanligini ko‘rsatmoqda.

 

BAAdagi rossiyalik sayyohlar bu holatga turlicha munosabat bildirmoqda. Ba'zilari portlashlardan cho‘chib, boshpana qidirmoqda. Boshqalari esa vaziyatga befarq ko‘rinib, hatto raketa hujumlarini videoga olishga tayyor. “Bu bir umrda bir marta bo‘ladigan voqea. Do‘stlarim bilan bu lahzani suratga olamiz,” — deydi Dubayda dam olayotgan rossiyalik sayyoh Sergey.

 

Mutaxassislar xavfsizlikni saqlash, odamlar gavjum joylardan uzoqlashish va rasmiy axborot manbalarini kuzatib borishni tavsiya qilmoqda. BAA osmonining yopilishi parvozlar kechikishi va yo‘nalishlarning o‘zgarishiga olib kelishi mumkinligi sababli sayohatchilarga aviakompaniyalari bilan aloqada bo‘lish tavsiya etiladi.

 

Eslatib o‘tamiz, bir necha kun avval Eron raketalari Yevropaning Kipr oroli ustidan uchib o‘tgan va ko‘plab sayyohlarni qo‘rqitgan edi. Ijtimoiy tarmoqlarda basseyn bo‘yida dam olayotgan turistlar raketa uchishini kuzatgan videolar tez tarqaldi. "Tungi osmon qo‘rqinchli tomoshaga aylandi", — deb yozdi ulardan biri.