Britaniya hukumati sayt rebrendingiga 673 ming dollar sarfladi
Rebrending doirasida fon rangi qoradan ko‘kka o‘zgartirilgan.
Britaniya hukumati rasmiy gov.uk saytining dizaynini yangilash uchun qariyb 673 ming dollar (532 ming funt sterling) sarfladi. Daily Mail nashrining yozishicha, rebrending doirasida fon rangi qoradan ko‘kka o‘zgartirildi, domendagi nuqta esa markaziy holatga ko‘chirildi.
Loyiha xalqaro reklama agentligi M&C Saatchi tomonidan amalga oshirilib, umumiy shartnomalar qiymati 750 ming funtgacha baholangan. Xarajatlar davlat byudjeti hisobidan qoplanadi.
Bu yangilanish ijtimoiy tarmoqlarda va davlat xizmatchilari forumlarida tanqidlarga uchradi. Ayrim foydalanuvchilar: “Kimdir chindan ham nuqtani surish uchun pul oldimi?”, — deb istehzo bilan yozishdi. Boshqalar esa yangi dizaynni “arzonkor”, “nojo‘ya” va “diqqatdan holi” deb atadi.
Reform UK partiyasi vakili Zia Yusuf bu harakatni “soliq to‘lovchilarga nisbatan ochiq hurmatsizlik” deb baholadi. Hukumatsiz tashkilotlar ham bu xarajatni keraksiz deb hisoblab, hukumatni asosiy xizmatlarga emas, “ko‘rinishga” e’tibor qaratayotganlikda aybladi.
Rasmiylar esa xarajatlarni oqlab, rebrending nafaqat logotip, balki butun veb, mobil va ilova platformalari uchun kengaytirilgan vizual o‘zgarishlarni ham o‘z ichiga olganini ta’kidlashdi. Sayt oxirgi bor 2012-yilda yangilangan edi.
