Rossiya AQShning Eron bo‘yicha hujumlarini keskin qoraladi
AQSh o‘z hukmronligini saqlab qolish uchun har qanday jinoyatga tayyor.
Rossiyaning BMTdagi doimiy vakili Vasiliy Nebenzya AQShni “o‘zining global hukmronligini saqlab qolish” maqsadida “har qanday jinoyatlarga” tayyorlikda aybladi. Bu haqda u Eronning so‘rovi bilan chaqirilgan BMT Xavfsizlik Kengashining favqulodda yig‘ilishida bayon qildi.
O‘tgan o‘n kun ichida Xalqaro atom energiyasi agentligi (MAGATE) bosh direktori Rafael Grossi Eron yadroviy infratuzilmasiga berilgan zarbalar butun mintaqa va hatto global miqyosda oldindan aytib bo‘lmaydigan oqibatlarga olib kelishi mumkinligi haqida ogohlantirgan edi. Shunga qaramay, Vashingtonni na radiatsion oqibatlar, na minglab tinch aholi hayoti va sog‘lig‘iga tahdid qiziqtirmoqda, — dedi Vasiliy Nebenzya.
AQSh o‘zining global g‘oyaviy va siyosiy ustunligini saqlab qolish uchun xalqaro huquqni buzib, istalgan jinoyatga qo‘l urishga tayyor ekanligini yana bir bor isbotladi, — deya qo‘shimcha qildi u va Rossiya bu hujumlarni “eng qat’iy tarzda” qoralashini ta’kidladi.
22-iyunga o‘tar kechasi AQSh havo kuchlari Eronning Natanz, Fordo va Isfahon shaharlaridagi yadro obyektlariga keng ko‘lamli zarbalar berdi. MAGATE zarbalar oqibatida radiatsiya chiqishi qayd etilmaganini ma’lum qildi. Eron prezidenti Mas’ud Pezeshkian AQShning bu hujumlariga albatta javob bo‘lishi kerakligini aytdi.
