Rossiyada xorijliklar uchun ijtimoiy sug‘urta tizimi qayta ko‘rib chiqilmoqda
Rossiya chet ellik ishchilarning sug‘urta nafaqasiga kirish shartlarini o‘zgartirmoqchi.
Rossiya Davlat Dumasida ko‘rib chiqilayotgan yangi qonun loyihasiga ko‘ra, Rossiyada mehnat qilayotgan chet el fuqarolari faqatgina olti oylik sug‘urta stajiga ega bo‘lsalargina kasallik ta’tili uchun to‘lov olish huquqiga ega bo‘ladilar.
Bu haqda Davlat Dumasining Mehnat, ijtimoiy siyosat va faxriylar ishlari bo‘yicha qo‘mitasi rahbari Yaroslav Nilov ma’lum qildi. Uning so‘zlariga ko‘ra, hozirgi qonunchilik barcha chet el fuqarolari va fuqaroligi bo‘lmagan shaxslarning ijtimoiy sug‘urta tizimida qatnashishini nazarda tutadi. Shu bilan birga, vaqtinchalik yashash huquqiga ega shaxslar va Yevroosiyo iqtisodiy ittifoqi (YeOI) a’zosi bo‘lgan davlatlarning fuqarolari Rossiya fuqarolari bilan teng shartlarda ijtimoiy kafolatlardan foydalanmoqda. Bu esa, ijtimoiy fond byudjetiga ortiqcha bosim yuklayotgani ta’kidlandi.
Yangi qonun loyihasi ushbu tizimni optimallashtirish, moliyaviy barqarorlikni saqlashga qaratilgan. Loyihaga ko‘ra, sug‘urta mukofotlari kasallik hodisasi yuz berishidan kamida olti oy oldin to‘langan bo‘lishi shart etib belgilanmoqda.
Biroq, onalik nafaqasi uchun eng kam yillik sug‘urta staji talab etilishi hali ham saqlab qolinadi. Belarus fuqarolari va boshqa mamlakatlarning yuqori malakali mutaxassislari bu cheklovlardan mustasno etiladi.
