MSNBC va CNN telekanallari “axlat” — Tramp
AQSh prezidenti 12 kunlik urush yakunida OAV va Eron haqida keskin bayonot bilan chiqdi.
AQSh prezidenti Donald Tramp Fox News telekanaliga bergan intervyusida MSNBC va CNN’ni keskin tanqid qildi. U mazkur telekanallarni “axlat” deb atar ekan, ularni soxta yangiliklar tarqatishda aybladi.
Trampning ta’kidlashicha, ushbu ommaviy axborot vositalari uning AQSh harbiy-havo kuchlari tomonidan Eron yadroviy obyektlariga berilgan zarbalar natijasida “barcha inshootlar butunlay vayron qilindi” degan bayonotini shubha ostiga qo‘ygan.
“Eron hech qachon yadroviy dasturini tiklamaydi. Mutlaqo. Hammasi vayron bo‘ldi. B-2 uchuvchilari o‘z missiyasini a’lo darajada bajardi”, — dedi Tramp.
U, shuningdek, tanqidiy savollar bergan jurnalistlarni, zarba bergan harbiylardan uzr so‘rashga chaqirdi.
Ma’lumot uchun, 22-iyunga o‘tar kechasi Tramp AQSh harbiy-havo kuchlari Eronning uchta yadroviy obyektiga hujum qilganini bildirgan edi. Unga ko‘ra, bu inshootlar uranni boyitish bo‘yicha Eronning asosiy markazlari bo‘lgan.
Oradan ikki kun o‘tib, Tramp Eron va Isroil o‘zaro o‘t ochishni to‘xtatishga kelishib olganini ma’lum qildi. U 12 kunlik urush tugaganini olqishlab, “bu kelishuv katta muvaffaqiyat” ekanini ta’kidladi.
