Isroil endi Livanga hujum qildi
Hujum oqibatida kamida 3 kishi halok bo'ldi.
Seshanba kuni Livan janubidagi Kfar Dajjal shaharchasida yuz bergan dron hujumida kamida uch kishi halok bo‘ldi. Livan sog‘liqni saqlash vazirligi ma’lumotiga ko‘ra, hujum natijasida avtomobil nishonga olingan, qurbonlar orasida Hizbulloh bilan moliyaviy aloqadorlikda gumon qilingan erkak va uning ikki o‘g‘li bor.
Bu hodisa dushanba kuni Isroil tomonidan Litani daryosining shimolidagi bir nechta shaharlarga uyushtirilgan aviazarbalar ortidan ro‘y berdi. Isroil harbiylari bu hujumlar Hizbullohga tegishli raketa uchirish nuqtalari va qurol omborlariga qarshi qaratilganini bildirdi. Ammo seshanbadagi dron hujumi yuzasidan izoh bermadi.
Hizbulloh o‘tgan oy tuzilgan sulh shartlariga binoan Litani daryosining janubiy qismlaridan kuchlarini olib chiqqan. Biroq Isroil harbiy amaliyotlarni davom ettirmoqda. Ayni paytda Hizbulloh rasmiylari Eronni qo‘llab-quvvatlash niyatida emasliklarini aytmoqda. “Eron o‘zini o‘zi himoya qila oladi”, – degan edi Hizbulloh rasmiysi o‘tgan haftada.
Livan bosh vaziri Nawaf Salam esa Dohada Qatarning bosh vaziri bilan birgalikda o‘tkazilgan matbuot anjumanida Isroilning sulhni buzayotganini keskin qoraladi. “Livan hududi bo‘ylab davlat hokimiyatini tiklash ustida ishlayapmiz. Mamlakat barqarorligi uchun Isroilning to‘liq chiqib ketishi zarur, ayniqsa hali ham egallab turgan besh hududdan”, – dedi u.
