Rossiya va Ukraina o‘rtasida navbatdagi mahbuslar almashinuvi bo‘lib o‘tdi
Tomonlar “1000 kishiga 1000” formulasi asosida mahbuslarni qaytardi.
Rossiya va Ukraina o‘rtasida mahbuslar almashinuvi bo‘yicha navbatdagi bosqich muvaffaqiyatli amalga oshirildi. Bu haqda TASS agentligi Rossiya muzokaralar guruhiga yaqin manbaga tayanib xabar berdi, deb yozadi Oxu.Az.
Manbaga ko‘ra, mazkur almashuv Istanbulda o‘tkazilgan muzokaralar doirasida amalga oshirilgan bo‘lib, tomonlar mahbuslarni teng miqdorda qaytarishga kelishib olgan. “Mahbuslar almashinuvi teng bo‘ldi. Kelishuvlar davom etmoqda”, — deyiladi bayonotda.
Rossiya Mudofaa vazirligi ushbu ma’lumotni rasman tasdiqladi.
Ma’lumotlarga ko‘ra, Istanbuldagi muzokaralarning ikki bosqichidan so‘ng Turkiya vositachiligida tomonlar “1000 kishiga 1000” formulasi asosida har ikki davlatdan kamida ming nafardan mahbusni almashishga kelishib olishgan. Shuningdek, og‘ir kasallar va 25 yoshgacha bo‘lgan shaxslar uchun “hammasi hamma uchun” prinsipi asosida alohida almashuv tartibi ham nazarda tutilgan.
Avvalroq, Rossiya Prezidentining matbuot kotibi Dmitriy Peskov payshanba kuni bergan izohida, Istanbul kelishuvlaridagi hozirgi bosqich yakuniga yetganidan so‘ng uchinchi raund bo‘yicha qarorlar qabul qilinishi mumkinligini bildirgan edi.
Mazkur almashuv urush holatidagi insoniy muammolarni yumshatish va diplomatik muzokaralarni davom ettirish borasida navbatdagi muhim qadam sifatida baholanmoqda.
